బెంగళూరులో మోడిఫైడ్ కారు విన్యాసాలు.. రూ.1.11 లక్షల జరిమానా చెల్లించిన విద్యార్థి

సోషల్ మీడియాలో వైరల్ అయ్యేందుకు చేసిన ఓ ప్రయత్నం కేరళకు చెందిన ఇంజినీరింగ్ విద్యార్థికి భారీ షాక్ ఇచ్చింది. అక్రమంగా మార్పులు చేసిన కారుతో బెంగళూరు రోడ్లపై హల్‌చల్ చేయగా, అధికారులు ఏకంగా రూ.1.11 లక్షల జరిమానా విధించారు. కారు ఎగ్జాస్ట్ పైపు నుంచి మంటలు చిమ్ముతూ, భయంకరమైన శబ్దాలు చేస్తూ ప్రయాణించడం ప్రజా భద్రతకు ముప్పుగా పరిణమించడంతో ఈ కఠిన చర్యలు తీసుకున్నారు.

వివరాల్లోకి వెళితే.. కేరళలోని కన్నూర్ జిల్లాకు చెందిన ఓ ఇంజినీరింగ్ విద్యార్థి, కొత్త సంవత్సర వేడుకల కోసం తన కారులో బెంగళూరుకు వచ్చాడు. కేవలం రూ.70,000 పెట్టి కొనుగోలు చేసిన 2002 మోడల్ హోండా సిటీ కారుకు భారీగా మార్పులు చేశాడు. సైలెన్సర్ మార్చి పెద్ద శబ్దాలతో పాటు ఎగ్జాస్ట్ నుంచి మంటలు వచ్చేలా ఏర్పాటు చేశాడు. అధికారుల అనుమతి లేకుండా కారు రంగు మార్చడం, నంబర్ ప్లేట్‌ను మార్చడం, దానిపై "బ్యాంగర్" అని గ్రాఫిటీ వేయడం వంటివి చేశాడు.

జనవరి ప్రారంభంలో హెన్నూర్ రోడ్డులోని భారతీయ సిటీ సమీపంలో ఈ కారు నిప్పులు చిమ్ముతూ వెళ్తున్న వీడియోలు సోషల్ మీడియాలో విస్తృతంగా వ్యాపించాయి. ఈ వీడియోలను గమనించిన స్థానికులు, వాహనదారులు పోలీసులకు ఫిర్యాదు చేశారు. దీంతో రంగంలోకి దిగిన హెన్నూర్ ట్రాఫిక్ పోలీసులు జనవరి 2న కారును అడ్డగించి స్వాధీనం చేసుకున్నారు. అనంతరం జనవరి 3న యలహంక ప్రాంతీయ రవాణా కార్యాలయం (RTO) అధికారులకు సమాచారం అందించారు.

మోటారు వాహనాల చట్టంలోని పలు నిబంధనలను ఉల్లంఘించినందుకు గాను అధికారులు అతనికి మొత్తం రూ.1,11,500 జరిమానా విధించారు. బుధవారం యలహంక ఆర్టీవో కార్యాలయంలో విద్యార్థి ఈ మొత్తాన్ని చెల్లించడంతో అధికారులు వాహనాన్ని తిరిగి అప్పగించారు. కారు కొన్న ధర కంటే జరిమానా మొత్తం ఎక్కువగా ఉండటం గమనార్హం. ఇలాంటి మార్పులు శబ్ద కాలుష్యానికే కాకుండా, అగ్ని ప్రమాదాలకు దారితీస్తాయని, వాహనాలను గుర్తించడంలో ఇబ్బందులు కలిగిస్తాయని అధికారులు స్పష్టం చేశారు.

సోషల్ మీడియా స్టంట్స్ కోసం వాహనాలకు మార్పులు చేయడం ఇటీవల పెరిగిపోవడంతో బెంగళూరు ట్రాఫిక్ పోలీసులు కఠినంగా వ్యవహరిస్తున్నారు. రోడ్డు భద్రతను పణంగా పెట్టి చేసే ఇలాంటి చట్టవిరుద్ధమైన పనులను అరికట్టేందుకే ఈ భారీ జరిమానా విధించినట్లు తెలిపారు.